ഇന്ദ്രൻസിന് മികച്ച നടനുള്ള സൗത്ത് ഏഷ്യൻ അന്താരാഷ്ട്ര പുരസ്‌കാരം : മലയാള സിനിമയ്ക്ക് ഇത് അഭിമാന നിമിഷം ! #SHARE

ചൈനയിലെ ഷാങ്ഹായ് രാജ്യാന്തര ചലച്ചിത്രമേളയില്‍ ഔട്ട്സ്റ്റാന്‍ഡിംഗ് ആര്‍ട്ടിസ്റ്റിക് അച്ചീവ്മെന്റ് പുരസ്‌കാരമടക്കം നേടി മലയാളസിനിമയുടെ യശസ്സുയർത്തിയ ഡോ. ബിജുവിന്റെ ‘വെയിൽ മരങ്ങൾ’ എന്ന ചിത്രത്തിന് ഇതാ മറ്റൊരു അന്താരാഷ്ട്ര അംഗീകാരം കൂടി. സിംഗപ്പൂര്‍ സൗത്ത് ഏഷ്യന്‍ ഇന്റര്‍നാഷ്ണല്‍ ഫിലിം ഫെസ്റ്റിവലില്‍ വെയിൽ മരങ്ങളിലെ പ്രകടനത്തിന് മികച്ച നടനുള്ള പുരസ്‌കാരം ഇന്ദ്രന്‍സിന് ലഭിച്ചിരിക്കുന്നു. ആദ്യമായാണ് ഇന്ദ്രൻസ് എന്ന നടന് ഒരു അന്താരാഷ്ട്ര പുരസ്കാരം ലഭിക്കുന്നത്. കേരളത്തില്‍ നിന്ന് ഹിമാചലിലേക്ക് പലായനം ചെയ്യപ്പെട്ട ദളിത് കുടുംബത്തിന്റെ കഥ പറയുന്ന സിനിമയാണ് വെയിൽ മരങ്ങൾ. ഏതാണ്ട് ഒന്നര വര്‍ഷത്തോളമെടുത്താണ് ഈ ചിത്രം പ്രകൃതിയോടിണങ്ങി തന്നെ ചിത്രീകരണം പൂർത്തിയാക്കിയത്. ഹിമാചല്‍പ്രദേശ്, കേരളത്തിലെ മണ്‍റോ തുരുത്ത് എന്നിവിടങ്ങളിലായി വിവിധ കാലാവസ്ഥകളില്‍ ഒന്നര വര്‍ഷ കാലയളവിൽ ചിത്രീകരിച്ച ഈ ചിത്രത്തിന്റെ ഛായാഗ്രഹണം അന്തരിച്ച പ്രശസ്ത ഛായാഗ്രഹകന്‍ എം.ജെ രാധാകൃഷ്ണനാണ് നിർവ്വഹിച്ചത്. ഡോ. ബിജുവിന്റെ വെയിൽമരങ്ങൾ എന്ന ചിത്രത്തിൽ ഇന്ദ്രന്‍സ്, സരിത കുക്കു, കൃഷ്ണന്‍ ബാലകൃഷ്ണന്‍, പ്രകാശ് ബാരെ, മാസ്റ്റര്‍ ഗോവര്‍ധന്‍, അശോക് കുമാര്‍, നരിയാപുരം വേണു, മെല്‍വിന്‍ വില്യംസ്, എന്നിവരാണ് പ്രധാന വേഷങ്ങളില്‍ അഭിനയിച്ചിരിക്കുന്നത്.

വെയിൽ മരങ്ങളുടെ ശബ്ദ മിശ്രണം പ്രമോദ് തോമസ്, ലൊക്കേഷന്‍ സിങ്ക് സൗണ്ട് ജയദേവന്‍ ചക്കാടത്ത്, സ്മിജിത് കുമാര്‍ പി.ബി, എഡിറ്റിങ് ഡേവിസ് മാനുവല്‍, സംഗീതം ബിജിബാല്‍, കലാസംവിധാനം ജോതിഷ് ശങ്കര്‍, ചമയം പട്ടണം ഷാ, കോസ്റ്റ്യൂംസ് അരവിന്ദ് കെ.ആര്‍ എന്നിവർ നിർവ്വഹിക്കുന്നു. നേരത്തെ ഷാങ്ഹായ് മേളയില്‍ പുരസ്‌കാരം നേടുന്ന ആദ്യ ഇന്ത്യന്‍ ചിത്രമെന്ന ഖ്യാതിയും ലഭിച്ചാണ് വെയില്‍ മരങ്ങള്‍ സിംഗപ്പൂർ സൗത്ത് ഏഷ്യൻ ഇന്റർനാഷണൽ ഫിലിം ഫെസ്റ്റിവലിൽ എത്തിച്ചേർന്നതും ഇപ്പോൾ ഇത്തരമൊരു മികച്ച പുരസ്കാരത്തിന് അർഹമായിരിക്കുന്നതും.